(dal Vangelo di Giovanni 21, 15-19)
Appena ca fineru di manciari,
si stettiru nna spiaggia a ripusari,
ancora stanchi pi la gran nuttata
e p’a fatica di la matinata.
Gesù nveci si misi a passiari
tranquillu pi la spiaggia di lu mari,
e qualchi petra chiatta jia tirannu
ntall’acqua dunni ch’ jia satariannu.
Petru si rapi l’occhi ed è già aggritta
e allatu va a Gesù, ch’è a manu ritta.
“Chi fai?” – ci rici Petru curiusu –
ma si capisci ch’è tutta una scusa
pi starisi vicinu a lu Signuri,
picchì oramai un lu viri tutti l’uri.
Gesù arrispunni: “A tia stavu aspittannu,
pi sentiri chi cosa t’addumannu”.
Petru u talìa un sapennu chi pinsari,
quannu Gesù accumincia a dumannari:
“Simuni di Giuvanni, mi vô beni?
Chiossà di tutti l’autri mi vô beni?”.
“Signuri, chi dumanna tu mi fai?
Ti vogghiu beni, e chistu tu lu sai!”.
Gesù ci dici: “Pasci li me agneddi!”.
E doppu tira n’autri dui ciampeddi.
“Simuni, mi vô beni veramenti?”
– ci dici n’atra vota seriamenti.
E subitu Simuni ci arrisspunni:
“Certu! Tu u sai, picchì mi l’addumanni?”.
“Allura pasci li me picureddi!”
– ci dici – (… ncelu volanu l’aceddi).
Ma secuta Gesù p’a terza vota
a ribattiri ancora a stessa nota.
“Simuni di Giuvanni, mi vô beni?”
Petru ci arresta mali e ncori teni
un duluri assai forti, picchì senti
ca Gesù tocca un tastu assai dulenti.
Ma ci arrispunni cu lu cori nmanu:
“Tuttu tu sai, tu sai quantu iu t’amu,
Signuri!…”. “Pasci li me picureddi”
– ci replica Gesù, ma ccà nun speddi.
E poi, Gesù cu vuci pinsirusa
dici a Petru na cosa mistiriusa:
“Fin’ora un hai bisogni chi qualcunu
t’aiuta puru a strinciri u curduni
di la to vesti, e vai pi la to strata
cu li to forzi; però na jurnata
veniri avi ca n’autru ti cunnuci
e ti porta d’unn’è ca a tia un ti piaci”.
Gesù nun parra cchiù, ma nta so menti
va assai luntanu, d’unni viri e senti
chiddu c’a Petru ci havi a capitari,
comu a so vita iddu avi a cunsignari,
u nomu di Gesù avi a purtari
e cu a so morti a Diu glorificari.
S’arripigghia ed a Petru po’ talia,
e ci dici: “Tu veni appressu a mia!”.
Padre Pino (Giuseppe Licciardi)
