(Matteo 14, 1-12; Marco 6, 17-29)
Du gran nfami d’Erodi avia arristatu
a Giuvanni Battista, e ncatinatu
d’intra o carciri po’ l’avia jittatu,
picchì Giuvanni ci avia rinfacciatu
ca a so cugnata iddu s’avia pigghiatu
comu muggheri, e chistu un gran piccatu
era davanti all’occhi du Signuri,
ca l’adulteriu è un veru disonuri.
Stu fattu ad Erodiadi un ci calava,
e na caciuni sempre idda circava
pi putiri a so raggia sudisfari,
picchí Giuvanni ci l’avia a pagari.
Ma puru ca nsistia cuntinuamenti,
Erodi un s’a sintia ‘i scuitari a genti,
ca ognunu pi profeta u rispittava,
e di fallu ammazzari un si fidava.
Ma ddu jornu ca Erodi fici l’anni
si priparau na festa veru granni,
e tutti i pezzi grossi di lu Statu
o riali banchittu avia nvitatu.
I musicanti misiru a sunari
e a figghia d’ Erodiadi a ballari
accuminció cu tantu i maistría
ca Erodi mbriacari si sintia.
Tutta la genti ch’era ddà, ncantata
si stava a talialla, e a la stagghiata
du ballu, la picciotta s’iu a nchinari
davanti a Erodi, ca u vulia onurari.
Erodi, chinu di cumpiacimentu,
davanti a tutti fa stu giuramentu:
“Dimmi cosa ti pozzu arrigalari;
tuttu chiddu chi voi tu pozzu dari!”
A so matri talìa, ca c’era un pattu
tra d’iddi, e dici a Erodi: “Supra a un piattu
a testa vogghiu di GiuvanBattista!”.
A sta proposta Erodi si rattrista,
ma avanti a tutti avennulu giuratu,
ci passi malu d’essiri pigghiatu
p’omu senza parola, e allura manna
li guardii p’eseguiri sta cunnanna.
Nto carciri li guardii prestu vannu
e assolvinu d’Erodi lu cumannu.
A Giuvanni ci tagghianu la testa,
supra a un piattu la portanu a la festa,
e a ballerina veni cunsignata
pi comu a cosa s’era già appattata.
Idda a duna a so matri, sudisfatta
ca a so minnitta finalmenti è fatta.
Li discipuli so cu gran primura
lu vinniru a pigghiari e a sepultura
addulurati doppu lu purtaru,
ed a Gesú da so morti nfurmaru.
Chista fu a fini amara di Giuvanni,
ca la vuci di Diu già pi tant’anni
nto desertu avia fattu risunari,
p’u populu o Signuri richiamari.
Giuseppe Licciardi (Padre Pino)
