(Matteo 16, 21-27)
Vinni u mumentu ca Gesù a parrari
accuminciò di cosa capitari
ci avia d’ora in avanti, e priparari
pi prima ai so discipuli a affruntari
tuttu chiddu chi c’era già signatu
supra o Messia ca Diu avìa mannatu.
E richiamannu tutti all’attenzioni
cuminciò a fari la so spiegazioni.
“Petru finìu di diri ca u Messia,
Figghiu di Diu Iu sugnu, e chista è a via
chi mi tocca di fari, si seguiri
di lu me Patri vogghiu lu vuliri.
U Figghiu ‘i l’Omu a strata avi a pigghiari
ch’Iddu a Gerusalemmi avi a purtari.
E ddà l’aspetta quantu già fu dittu
di li profeti, e chi fu puru scrittu.
L’anziani di lu populu e li capi
di sacerdoti e di cu è chi sapi
li scritturi e cos’è ch’è giustu fari
pu populu di Diu, l’hannu a pigghiari,
pi nimicu di Diu l’hannu a accusari,
davanti a liggi poi l’hannu a purtari,
e, nfini, a morti l’hannu a cunnannari.
Ma u terzu jornu avi a risuscitari.
Petru a stu puntu un pò cchiù suppurtari
tutti i discursi chi ci senti fari.
L’affera pi la mànica e poi, a sulu,
ci replica, tistardu comu un mulu:
“Senza mai Diu, Signuri! Mai a poi mai
a tia avi a capitari chistu, mai!”
Gesù si gira e duru: “Va’ d’arreri!
Satana sî pi mia chi to pinseri!
Mi sî d’impacciu, Petru, picchì un pensi
secunnu Diu, ma comu l’omu pensi!”
-ci dici-. E chi discipuli a parrari
continua, e u so pinseru sta a spiegari:
“Si qualcunu a so strata voli fari,
appressu a mia, allura arrinnigari
s’avi iddu stissu, e poi s’avi a jisari
supra i so spaddi a cruci, e sicutari!
Cu è ca a so vita voli guadagnari,
finisci ca la perdi; e cu è ca a dari
la propria vita è prontu, e u fa pi mia,
è certu ca la trova, e ssi nni pria.
Qual’è u vantaggiu ‘i l’omu chi pò aviri
u munnu nte so manu, si periri
vidi a so vita? cosa mai pò dari
si voli la so vita assicurari?
Nun firmativi a vidiri lu munnu
sulu d’un latu, picchì n’autru munnu
nn’aspetta; e u Figghiu ‘i l’Omu p’arrivari
sta mmezzu a gloria dunni va a truvari
lu Patri, chi so ancili, nto celu,
dunni oramai ogni omu, senza velu,
davanti ad Iddu s’avi a prisintari
e cuntu da so vita ci avi a dari!”.
Giuseppe Licciardi (Padre Pino)
