(Giovanni 3, 1-21)
Mentri a Gerusalemmi Gesù stava,
un capu di Giudei, ca si chiamava
Nicodemu, di notti u ju a truvari,
ca a sulu cu Gesù vulia parrari.
Iddu era un fariseu, ma assai u stimava
e cu granni rispettu ci parrava:
“Rabbì, sapemu, e un sugnu sulu iu,
ca pivveru tu sî un omu di Diu.
Mai e poi mai putissi un omu fari
i prudiggi chi t’emu vistu fari,
si nun vinissi da parti di Diu”.
Ci arrispunni Gesù: “U regnu i Diu
-e sti paroli sunnu tutti veri-
nudd’omu lu pò vidiri, s’arreri
Iddu nun nasci, ma stavota a vita
chi di ddancapu c’eni garantita”.
Ci dici Nicodemu: “Chi vo’ diri?
Forsi chi unu ntarreri arrè pò jiri
e turnari nta panza di so matri
e n’autra vota nasciri tra nuatri?”.
E Gesù ci arrispunni: “Iu ti dicu
-e tuttu veru è chiddu chi ti dicu-
ca siddu p’acqua e Spiritu tu un nasci
nto Regnu i Diu mai a trasiri arrinesci.
Tu u sai ca di la carni, carni nasci,
comu du Spiritu, spiritu nasci.
Un ti maravigghiari s’iu ti dissi
c’arrè di l’autu nasciri s’avissi.
U ventu tu u pò sentiri ciusciari,
ma ‘un capisci chi strata voli fari,
nè d’unni veni. E u stissu nun capisci
com’è cu è chi nto Spiritu rinasci”.
E Nicodemu torna a riplicari:
“Com’è chi chistu pò mai capitari?”
Gesù arrispunni allura: “Comu mai?
Tu si maistru e chisti cosi un sai?
S’iu parru di li cosi chi sû ncelu
sacciu chi dicu, ca vegnu du celu.
Chiddu ch’haiu vistu staiu a tistimoniari,
ma a me parola un vuliti accittari.
Comu Mosè nto palu isò o serpenti
mmenzu ô desertu, e si sarvava a genti
ca lu taliava, u stissu eni signatu
ca u Figghiu i l’Omu havi a essiri jisatu,
e allura avveni ca cu a Iddu cridi
si sarva e a vita eterna già ora vidi.
Ca veru tantu Diu stu munnu ha amatu,
ca p’iddu detti lu so Figghiu amatu!
Cu è ca a lu Figghiu cridi nun pirisci,
ma a vita eterna dintra ad iddu crisci.
Diu nun mannau a so Figghiu nta lu munnu
pi cunnannallu e fallu iri nfunnu,
ma pi sarvallu, ed è iddu ca nni salva,
picchì cu cridi ad Iddu già si salva.
Cu è ca a lu Figghiu un cridi è cunnannatu
picchì ô Figghiu du Diu ha rinjiatu”.
Giuseppe Licciardi (Padre Pino)
