Ddoppu chi nno’ Giordanu fu battiatu
e Figghiu di Diu Patri fu chiamatu,
Gesù fu da lu Spiritu purtatu
‘nta lu desertu p’essiri tintatu.
Iddu ju ddà pi fari penitenza:
quarant’ jorna ‘i dijunu e d’astinenza;
quannu si ntisi fraccu ed affamatu,
s’avvicinò lu diavulu dannatu.
“Si tu Figghiu di Ddiu sì veramenti,
cancia sti petri ‘npani sull’istanti!”.
Ma Gesù ci arrispunni: “Già sta scrittu
ca l’omu un vivi sulu i pani schittu,
ma vivi puru c’a parola viva,
chi nna vucca di Diu ci havi a surgiva”.
Ma nun cuntentu, u diavulu lu porta
nna città santa, e ddoppu lu trasporta
ddà ncapu a lu pinnaculu du tempiu,
a la vista di tutti e comu esempiu.
E ci dici a Gesù: “Tutta la genti
sta taliannu a tia, falli cuntenti.
Mostra a tutti ca sì Figghiu di Ddiu,
ca ognunu ti po’ diri: iu ti criui!”.
Basta ca tu ti jetti ‘i cca a pinninu,
ca l’ancili t’apparanu li manu
e ti portanu nterra belli belli,
senza chi nta li petri ti sfracelli.
Ma Gesù ci arrispunni o tentaturi:
“Sta scrittu: nun tintari o to’ Signuri!
‘Na vota ancora u diavulu ‘u pigghiau
e supra ‘na muntagna lu purtau,
tantu avuta ca u pizzu un cumparia,
ma d’unni tuttu u munnu si viria.
Tutti li regni ci mustrau da terra
e tutti li ricchizzi chi rinserra.
E poi ci dissi: “Tuttu chistu è miu,
ma tuttu sarà tuu, si u me’ disiu
po’ surisfari. Sulu chistu ha’ fari:
stannuti addinucchiuni, m’hai adorari!”.
Cu vuci forti e ferma Gesù, allura:
“Via, Satana, vatinni a la malura!
Tu sai cosa si leggi nne’ Scritturi:
“Adura sulu a Ddiu, ch’è u to’ Signuri!”
Un sulu Ddiu c’è ncelu, ed è u Signuri,
e sulu a Iddu, a Iddu sulu aduri.
U diavulu, un sapennu cchiù chi fari,
va, vota tunnu e ‘npaci u lassa stari.
Allura nto desertu, all’improvvisu,
tant’ancili scinneru ‘i ‘mparaddisu,
chi davanti a Gesù si prisintaru
e viviri e manciari ci purtaru.
Giuseppe Licciardi (Padre Pino)
