(Matteo 21, 23-27)
La genti un si stancava i caminari
apressu a lu Signuri, ca lassari
nun lu vulia pi curtu. Gesù, intantu,
avia trasutu nta lu tempiu santu
e tanta genti lu sta accumpagnari
ddà dintra. Gesù allura ad insignari
si misi cu paroli ca a la genti
lu cori ci tuccava intimamenti.
Ma u stissu fattu ca Gesù nsignava
ddà, dintra o tempiu, nun ci garbizzava
ai summi sacerdoti e all’anzïani,
ca tutti i cosi ci parianu strani
s’un eranu suggetti o so cumannu.
Subitu allura ncontru a Gesù vannu
e cu arruganza stannu a dumannari
cu ci detti u pirmissu i priricari.
“Cu quali autoritati vai nsignannu
nto tempiu? cu tu detti stu cumannu?”.
Gesù, cu tutta a calma di stu munnu
ci replica: “Iu subitu arrispunnu
a sta dumanna chi m’aviti fattu
si prima vuatri mi spiegati un fattu.
Giuvanni, lu sapiti ca vattiava
a tutta a genti chi ci addumannava.
Allura, mu spiegati cu ci dava
st’autorità a Giuvanni, si battiava
a quanti si dicianu piccaturi
e pintuti circavanu o Signuri?
Era Diu ca du celu ci la dava
o puru ca iddu stissu s’a pigghiava?
Chistu iu vi dumannu: mi la dati
na risposta cu tutta viritati?
Si sta risposta vuatri mi la dati,
iu vi dicu cu quali autoritati
iu fazzu soccu mi viriti fari,
picchì nun ci aiu nenti d’amucciari”.
Chiddi si taliaru strammiati,
sintennusi d’un tuttu ‘mmarazzati,
picchì un sapianu chi ci avianu a diri:
veni du celu o è d’omini u vuliri?
“Si ci dicemu ca vinia du celu,
iddu ni po arrispunniri: “Du celu?
e picchì un lu cridistivu, s’è veru
ca du celu vinìa”. Si poi pivveru
ci arrispunemu: “Di l’omini veni!”,
tutta sta fudda ccà cu è chi la teni?
ca di tutti Giuvanni eni pigghiatu
pi profeta, chi Diu avia mannatu”.
A stu puntu, cunfusi e bastuniati,
ci arrispunninu tutti amariggiati:
“Nun lu sapemu”. Allura Gesù dici:
Cu quali autoritati iu lu fici
nun vi lu dicu, tantu un ci criditi”.
Ma nto so cori pensa: “Nun capiti
ca pi mia tutta la filicitati
è di fari i me Patri a vuluntati?”.
Giuseppe Licciardi (Padre Pino)
