Biniritta di tutti sia Maria,
picchì pi Idda u munnu s’arricria,
ca senza nuddu che si l’aspittava
Diu Patri lu so Figghiu nni mannava.
Biniritta Maria, picchì davveru
all’Ancilu ci dissi un Sì sinceru,
e biniritta picchì a lu so pettu
idda allattau Gesù cu gran dilettu.
Biniritta Maria, chi vera matri
fu di Gesù, ca Diu avia pi Patri,
e quannu lu chiamava “figghiu miu”
l’ecu sintia di la vuci di Diu.
Biniritta Maria ca lu taliava,
mentri Gesù tranquillu arripusava,
e quanu si rapia l’occhi ammatinu
“mamma” chiamava e idda era vicinu.
Biniritta Maria, ca u va criscennu
e li cosi di Diu ci va dicennu,
e pigghiannulu poi pi li manuzzi
nne primi passi guida i so’ piruzzi.
E biniritta ‘nfini sia Maria
picchi detti Gesù a tia e a mia.
E sempri sia lodatu u Patri Santu
ca nni cummogghia tutti cu so mantu.
Padre Pino Licciardi
