(Luca 13, 10-17)
Di sabatu, com’è solitu fari,
nta sinagoga va Gesù a priari.
Ci mettinu nte manu li Scritturi
pi leggiri a Parola du Signuri.
Iddu leggi cu granni sintimentu
e poi cumincia lu so nsignamentu.
E mentri parra li so occhi gira,
e a vista di na fimmina l’attira.
La vidi mmenzu a l’autri ch’è aggubbata
e a so carina sta tutta curvata.
Stu malannu avia assai chi s’u purtava
e un c’era versu ch’idda gritta stava.
Già diciott’anni avianu passatu
ca u diavulu a tinia nta chistu statu.
Gesù nto cori senti cumpassioni
e subitu Iddu trova a soluzioni.
La chiama, e cu fatica caminannu,
dda fimmina va avanti, l’occhi isannu.
Gesù dici cu vuci di cumannu:
“Donna, sî strota ormai du to malannu!”.
Poi stenni li so manu e sull’istanti
dda fimmina s’aggrizza. Ora è raggianti
e voli dari sfogu a la so gioia,
gridannu a vuci forti: “A Diu sia gloria!”.
Ma u capu ‘a sinagoga eni sdignatu
picchì Gesù dda donna avia sanatu,
di sabatu. Si susi, e a genti dici:
“Sei sunnu i jorna ca u Signuri fici
pi travagghiari, e allura vui viniti
nta sti sei jorna p’essiri guariti,
ma nun tuccati u sabatu ca è santu!”.
A genti è muta e prova anticchia ‘i scantu.
Gesù, nun suppurtannu stu parrari,
subitu replicò a paroli chiari:
“Dimmi na cosa: picchi nun misuri
i paroli? Du pisi e du misuri
siti abituati a usari a cumminienza.
Ipocriti! si anticchia di cuscienza
ci aviti, forsi allura riflittiti
e finalmenti l’occhi vi rapiti.
Forsi un è veru ca stu jornu santu,
sabatu, ognunu i vuatri, senza scantu,
va a strogghiri u so voi da manciatura,
o u sceccu, e u porta all’abbiviratura?
E sta figghia d’Abramu, ncatinata,
pi diciott’anni i satana vessata,
nun avia a essiri ora libberata,
puru s’era di sabatu a jurnata?”.
A sti paroli di Gesù, sbriugnati
si ntisiru lu capu e i so alliati,
picchi cu ddui paroli chiari chiari
fici appariri a tutti minzugnari.
Mentri la genti nun putia frinari
la cuntintizza, e si misi a parrari
di maravigghi c’avia vistu fari
dda matina a Gesù , e a Diu esaltari.
Giuseppe Licciardi (PadrePino)
