(da Matteo, 15, 21-28)
Ogni tantu un fa mali iri a circari
un postu unni putiri arripusari.
Sia lu corpu ca l’anima lu vonnu
picchì ‘nnavemu propriu gran bisognu.
Gesù, ca sapi comu semu fatti,
capisci chisti cosi, picchì ‘nfatti
Iddu stissu ogni tantu scumparia
e ‘nna un postu tranquillu si nni ja.
Sta vota, cu l’apostuli, in camminu
si misi pi un paisi d’u cunfinu,
picchì vulia arrivari ‘nta li zoni
di li città di Tiru e di Sidoni,
dunni ci stannu i siri e li fenici
e ci abitanu puru tanti greci.
Gesù ‘nna sti citati ci havi amici
ca quannu li va trova su felici,
e iddu si senti comu nna so’ casa,
comu parenti l’abbrazza e li vasa.
Appena nna città di Tiru trasi,
già la notizia arriva ‘ntutti i casi:
la vuci c’avia fattu guarigioni
già avia jincutu tutta la regioni.
A sta notizia, la cchiù ntirissata
è ‘na sirofenicia, dispirata,
picchì ci havi na figghia ch’è malata
e puru du dimoniu è turmintata.
Ci trema u cori, mentri nna so menti
pensa ca pi so’ figghia finalmenti
ponnu finiri tutti ddi turmenti:
Gesù la po’ guariri ntempu un nenti.
Di cursa nesci tutta emozionata
e subitu cchiù avanti pi la strata
viri a Gesù cu la so’ cumpagnia,
allongha u passu e a vuci già spincia:
“Gesù, figghiu di Davidi, pietà!
me figghia soffri assai, pi carità,
un dimoniu ‘a turmenta e sulu tu
poi liberalla di sta schiavitù.
Gesù nun ci arrispunni e tira avanti
e dda mischina ‘a lassa malamenti.
L’apostuli si fermanu cunfusi
e puru iddi ci arrestanu delusi,
ca propriu un arrinescinu a capiri
picchì Gesù fa finta d’un sintiri.
Di solitu un si fa tantu priari
quannu quarcunu u veni a supplicari,
picchì si movi prestu a cumpassioni
e ai malati ci duna a guarigioni.
“Pi favuri, Gesù, s’un l’accuntenti
un ti lassa pi curtu. Ma nni senti?”
Ma Gesù fa lu surdu e la so strata
continua, e quannu iunci a la vutata
trasi nna casa di so’ amici, e chidda
si ‘nfila appressu comu ‘na faidda.
Fari mala fiura un c’interessa,
picchì granni è u bisognu chi l’attressa.
Gesù si vota, e poi “Chi tinni pari?
dici ch’è cosa giusta di livari
lu pani di la vucca di li figghi
pi dallu a li canuzzi? Chi nni pigghi?
La cananía nun si senti offisa
di sta parola, e replica decisa:
“Tu ci hai ragiuni, ma chiddu chi cari
di la tavula ‘nterra è già u manciari
pi li canuzzi, e chistu è megghiu i nenti,
ca chi muddichi campanu cuntenti
e cu la cura puru fannu festa
manciannu tuttu chiddu chi poi arresta”.
Gesù ci dici: “Donna, pi davveru
granni è a to’ firi, e u cori tuu è sinceru.
Nun po’ sapiri quanta cuntintizza
tu mi stai dannu! Macari na stizza
di la to firi fussi in Israeli!
Dicu ca si rapissiru li celi.
Ora vatinni a casa ca to figghia
è sana e bedda, ch’è na maravigghia.
Curri cu prescia e valla ad abbrazzari,
ormai u dimoniu nun la po’ncuitari.
Guarita è già to figghia… no, nun mori,
piccomu già spirava lo to’ cori.”
Giuseppe Licciardi (Padre Pino)
