‘A vidua di Nain

Accumpagnatu d’una fudda ‘i genti,
chi ci janu appressu tutti assai cuntenti,
a Nain già Gesù stava trasennu,
mentre chi ‘n’atra fudda sta niscennu
di ddu paisi, ma chi va chiancennu,
ca o’ campusantu stannu cunnucennu
un piucciutteddu mortu appena appena,
e a matri ci va appressu tutta ‘npena.

C’un corpu d’occhiu già Gesù capisci
lu straziu di dda matri, ca un finisci:
prima ‘u maritu avia idda pirdutu,
ed ora puru ‘u fugghiu avia murutu,
l’unicu figghiu chi ci avia arristatu
e chi era lu so’ tuttu, lu so’ ciatu.
Tuttu u paisi appressu a idda stava
e cu la so’ prisenza ‘a cunsulava.

Gesù fissa a dda matri addulurata,
ed a so’ matri pensa: é na vampata
di forti cumpassioni. Suspirannu,
“curaggiu!” -dici- e idda va ghisannu
araciu araciu l’occhi a lu Signuri,
sintennu dintra anticchia di caluri.

Oh, quantu voti nna dda stessa jurnata
ci avianu ripitutu sta sunata,
ma ddi paroli ‘un ci dicianu nenti,
tantu era lu so cori suffirenti.
Ma la parola di Gesù stavota
ci trasi dintra l’arma e la rivota
e senti ca na ciamma di curaggiu
s’adduma nno so’ cori comu un raggiu.

Gesù a la vara s’avvicina, e allura
cu li so’ manu ‘a tocca, e ‘i purtatura
si fermanu, un sapennu cosa fari.
Ora Gesù cu’ mortu sta a parrari:
“Nicuzzu -grida- staiu dicennu a tia,
susiti ‘i ddocu!”. Nuddu pipitia.
L’occhi iddu rapi e aggiru si talia,
viri a so matri e grira: “Mamma mia!”.

Gesù lu pigghia e a’ matri ci l’affida
chi chianci e riri, e pa’ gran gioia grida.
A genti è a bucca aperta, picchì a stentu
si po’ capacitari ‘i stu purtentu,
ma prestu s’arripigghia du stupuri,
e ghisa a vuci e loda lu Signuri,
chi un gran prufeta ci vosi mannari
in mezzu ad iddi e ‘i vosi visitari.

Cosi mai visti a Nain accapitaru,
e tutti li paisani accuminciaru
a spargiri la vuci, e nne’ paisi
di dda cuntrata e dunniegghè si ntisi
cuntari di stu fattu accussì granni,
ca di Gesù si parra a tutti ‘i banni.

Giuseppe Licciardi (Padre Pino)

LASCIA UN COMMENTO

Per Favore scrivi il tuo commento
Per favore inserisci il tuo nome